Diversifikimi i burimeve financiare për organizata më të qëndrueshme

Pas përfundimit të tre moduleve të para mbi qeverisjen e brendshme, mobilizimin e komunitetit dhe vlerësimin e ndikimit dhe monitorimin, edicioni i pestë i Shkollës për Aktivizëm vazhdoi me temën “Diversifikimi i burimeve financiare”.

Për OShC-të, qëndrueshmëria shkon përtej sigurimit të fondeve për zbatimin e aktiviteteve, ajo lidhet me aftësinë për të planifikuar në mënyrë strategjike, për të ruajtur pavarësinë e organizates, për të zgjeruar bazën e mbështetjes dhe për të vazhduar punën edhe përtej cikleve të projekteve.

Përgjatë dy ditëve, sesionet u udhëhoqën nga znj. Albana Zogu, eksperte për mbledhje të fondeve. Në diskutime u theksua se mbështetja financiare nuk duhet të kuptohet vetëm si donacion, por edhe si mundësi që qytetarët/et, komunitetet dhe partnerët të bëhen pjesë e një misioni më të gjerë shoqëror.

Një pjesë e rëndësishme e modulit iu kushtua formave të ndryshme të mbledhjes së fondeve, përfshirë donacionet e njëhershme, anëtarësimin, “crowdfunding”, mbledhjen e fondeve përmes rrjetit të mbështetësve, eventet, bashkëpunimin me korporata dhe mbështetjen nga donatorë të mëdhenj. Përmes këtyre shembujve u trajtua edhe rëndësia e hartëzimit të komunitetit, identifikimit të mbështetësve dhe ndërtimit të marrëdhënieve afatgjata me njerëzit që besojnë në punën e organizatës.

Ky modul u ofroi pjesëmarrësve/eve mundësinë të reflektojnë mbi qëndrueshmërinë financiare si pjesë të zhvillimit të përgjithshëm organizativ, duke e parë mbledhjen e fondeve jo vetëm si proces financiar, por si mënyrë për të ndërtuar besim, për të zgjeruar përkrahjen dhe për ta forcuar lidhjen ndërmjet organizatave dhe komuniteteve që ato u shërbejnë.

Shkolla për Aktivizëm organizohet në kuadër të Qendrës së Burimeve për Shoqërinë Civile në Kosovë.

Ky aktivitet bashkëfinancohet nga Bashkimi Evropian dhe Suedia. Përmbajtja e tij është përgjegjësi e vetme e Fondacionit Kosovar për Shoqëri Civile (KCSF) dhe Community Building Mitrovica (CBM) dhe nuk pasqyron domosdoshmërisht pikëpamjet e Bashkimit Evropian ose të Suedisë.